Verndum Þjórsá

Ég skoðaði fyrirhugað virkjunarsvæði stjórnvalda í Þjórsá um helgina. Það er slys í uppsiglingu ef af þessu verður. Það verður fróðlegt að sjá hvort Samfylkingin spyrni við fótum eða taki þátt í stóriðjubrölti og áframhaldandi náttúruspjöllum fyrrverandi ríkisstjórnar. 

Við fórum nokkur á sunnudaginn í heimboð í sumarbústaðinn Fagradal í landi Haga  þar sem Landsvirkjun stefnir að því að sökkva náttúruperlum, flúðum,eyjum, klettum, og grónu landi. Hjónin Guðbjörg Friðriksdóttir og Sigurður L. Einarsson tóku vel á móti okkur og miklum fjölda gesta yfir daginn.

Magnað safn

Louvre safnið í París er eitt merkilegasta listasafn sem ég hef heimsótt. Eyddi þar góðum hluta úr degi í fyrrahaust með því að  skoða það á hlaupum. Þetta er það stórt safn að maður þarf að heimsækja það oft. Kíki örugglega aftur á það í maí. Safn sem allir verða að heimsækja sem fara til Parísar.

Mér þykir miður að flytja eigi hluta af því úr landi. Slæmt fyrir París en gott fyrir Abu Dhabi.

Louvre opnar útibú í Abu Dhabi

Álfa og tröllasafn á Stokkseyri

 

 

Draugasafnshöfðingjarnir með Benedikt Guðmundsson í broddi fylkingar eiga heiður skilinn fyrir frábært framtak. Það er dýrmætt fyrir sveitarfélag eins og Árborg að eiga svona framtaksamt fólk sem lætur verkin tala. Menningarverstöðin á Stokkseyri er orðið eitt merkilegasta menningarhús landsins.

Álfa og tröllasafnið er góð viðbót við Draugasafnið og öll hin söfnin á Eyrarbakka og Stokkseyri.

Til hamingju!

 

Álfa- og tröllasafn opnað á Stokkseyri

Sannkölluð hetja

Hann Egill er sannkölluð hetja. Gaman þegar börnum eru veittar viðurkenningar fyrir afrek sín. Átta ára drengur stendur sig ótrúlega vel í aðstæðum sem margir fullorðnir hefðu átt erfitt með að höndla. Þetta sýnir okkur mikilvægi þess að hafa forvarnir í lagi og nauðsyn þess að þjálfa alla í skyndihjálp. Í svona aðstæðum skipta mínútur öllu máli. Til hamingju Egill!

Átta ára drengur hlaut viðurkenningu sem Skyndihjálparmaður ársins

Stríð og ofbeldi einkennir World Press Photo

Ég er áhugamaður um ljósmyndun og hef verið lengi. Ljósmyndirnar í World Press Photo eru oftast nær mjög magnaðar.

Það sem einkennir myndirnar er stríð og ofbeldi. Veruleiki sem við búum við enda eru þetta fréttaljósmyndir.

Í ár er engin undantekning þar á. Verðlaunamyndin er af ungum Líbönum í glansandi blæjubíl í bíltúr um sundurtætt hverfi í Beirút. Miklar andstæður.

Meira að segja íþróttaljósmynd ársins þarf að tengjast ofbeldi. Myndin sýnir fótboltahetjuna Zidane skalla  Ítalann Marco Materazzi í bringuna. Gátu þeir nú ekki valið íþróttamannslegri mynd? Er þetta nú hinn sanni íþróttaandi?

Ljósmynd ársins tekin í Beirút

Gleðilegt nýtt ár

 

 

 

 

 

 

Vonandi verður nýtt ár ykkur öllum ánægjulegt og heillaríkt.

Rauða húsið á Eyrarbakka

Veitingarstaðurinn Rauða húsið á Eyrarbakka er staður sem ég mæli með. Fór þangað á föstudagskvöldið ásamt nokkrum félögum mínum úr VG í Árborg. Áttum þar ánægjulega kvöldstund saman þar sem pólitísk umræða var lögð að mestu leyti til hliðar.

Maturinn í Rauða húsinu er alltaf jafn góður. Hef farið þangað annað slagið síðustu árin og hef alltaf verið jafn ánægður með matinn og þjónustuna. Staðurinn er með heimasíðu sem vert er að skoða: http://www.raudahusid.is.

Ég bendi fólki sérstaklega á að lesa um sögu Eyrarbakka sem er mjög merkileg.  Í því samhengi bendi ég m.a. annars á heimasíðuna; http://www.eyrarbakki.is/

Verslunar- og siglingarsaga staðarins er löng.  Á fyrstu öldum byggðar á Íslandi verður þar til höfn og um 1100 verður höfnin á Eyrarbakka ein helsta höfn Suðurlands allt fram til seinni heimstyrjaldar.

 

Gleðileg jól

Sendi öllum nær og fjær mínar bestu jóla og nýárskveðjur. Njótið jólanna og vonandi verða hátíðisdagarnir flestum til gleði og yndisauka.

 

Jólakveðjur,

Hilmar

 

Jólasveinarnir í heimsókn

Í gær komu jólasveinarnir á Selfoss frá Ingólfsfjalli. Skemmtilegir sveinar það. Reyndar var þetta bara stutt heimsókn í tilefni þess að verið var að kveikja á jólatrénu við Hótel Selfoss. Þeir fóru strax aftur heim til sín að því loknu. Það styttist í það að þeir fari að koma einn og einn og færa stilltum börnum eitthvað fallegt í skóinn. Vonandi hefur óþægðin í sumum í síðustu viku ekki smitast til barnanna.

Fyrr um daginn var jólafimleikasýning Fimleikadeildar Selfoss. Reyndar voru þær tvær sýningarnar, ein fyrir hádegi og ein eftir hádegi. Ástrós dóttir mín tók þátt í sýningunum sem voru mjög skemmtilegar.

Flottir tónleikar

Fórum á fína tónleika í kvöld í Laugadalshöllinni. Evrópsku dívurnar.  Sissel og Eivör voru lang bestar. Ragga stóð sig vel eins og venjulega. Glæsilegir tónleikar í alla staði,  með 50 manna strengjasveit úr Sinfóníuhljómsveit Íslands, Drengjakór Reykjavíkur og Karlakórnum Fóstbræðum.

Evrópsku dívurnar eru frá Færeyjum, Grikklandi, Írlandi, Íslandi og Noregi. Söng hver um sig jólalag frá sínu landi. Ragga Gísla söng „Það á að gefa börnum brauð“.